Այլ օգտվողներ
Խոշոր ընկերություններ
Միջազգային ֆինանսական սպասարկման կենտրոնների կարևոր կորպորացիոն օգտվողներից են նաև անդրազգային ընկերությունները:
Տարիներ շարունակ անդրազգային ընկերություններն այդ կենտրոնները կիրառել են իրենց միջազգային առևտրային գործունեությունը սպասարկող ընկերություններ գրանցելու համար: Ստորև նշված են հիմնական ոլորտները, որտեղ այդ ընկերություններն օգտվում են միջազգային ֆինանսական սպասարկման կենտրոնների ծառայություններից.
- Հոլդինգային ընկերությունների գրանցում
- Ուղղակի օտարերկրյա ներդրումների կառուցվածքավորում
- Մտավոր սեփականության իրավունքի տնօրինում
- Ընկերությունների կենտրոնների հիմնադրում
- Փաստացի գործարքների իրականացում
- Կապիտալի ներգրավում
- Բորսայում արժեթղթերի տեղավորում
- Դրամամիջոցների կառավարման գործարքներ
- Որպես մեկ կամ մի քանի ընկերություններին պատկանող ապահովագրական ընկերության գտնվելու վայր
Մասնագիտացված կորպորացիոն օգտվողներ
Մասնագիտացված կորպորացիոն օգտվողների օրինակներից են բեռնափոխադրող և ավիացիոն ընկերությունները: Բեռնափոխադրող ընկերություններն օգտվում են օֆշորային նավագնացային կենտրոններից՝ իրենց նավերը գրանցելու համար՝ սկսած 1920 թվականից: Այս բնագավառի առավել հին բնորոշ առանձնահատկություններից է բաց գրանցումը: Գոյություն ունի բաց ռեգիստրների երեք տեսակ.
- Անկախ ռեգիստրներ
- Ռեգիստրներ կախյալ տարածքներում
- Օֆշորային ռեգիստրներ
Անկախ ռեգիստրը այն ռեգիստրն է, որը գործում է անկախ պետություններում: Այդպիսի ռեգիստրի օրինակ է Պանամայի ռեգիստրը: 1920 թվականից սկսած՝ Պանաման ԱՄՆ ընկերությունների սեփականություն հանդիսացող նավերի գրանցման սիրված վայրն է եղել:
Մեկ այլ հայտնի անկախ ռեգիստր է Լիբերիայի ռեգիստրը՝ ստեղծված 1949 թվականին:
Կայմանյան Կղզիները և Բրիտանիայի այլ գրանցման վայրեր կարող են ծառայել որպես կախյալ տարածքների ռեգիստրների օրինակ, քանի որ դրանց հիմնական օրենքները հիմնված են անգլիական օրենքների վրա:.
Պետությունները, որոնք մտադիր են հատուկ գրանցում տրամադրել՝ առաջարկելով ավելի ազատական միջավայր, ստեղծում են օֆշորային ռեգիստրներ, օրինակ՝ Նորվեգիայի միջազգային ռեգիստրը:
Վերջին տասնամյակում միջազգային ծովային բեռնափոխադրման ոլորտում նկատվում է էական զարգացում, և այդ ժամանակվանից ի վեր մի շարք օֆշորային կենտրոններ առաջարկում են այդ եկամտաբեր ոլորտի ապահովման գրավիչ հնարավորություններ:
Ինքնաթիռների օֆշորային գրանցման ոլորտում ևս գործում է ակտիվ օֆշորային շուկա: Առավել խոշոր շրջանառությամբ կենտրոններից են Արուբան և Սեյշելյան Կղզիները:
Սեփականատիրոջ կողմից ղեկավարվող ընկերություններ
Միջազգային ֆինանսական սպասարկման կենտրոնների անդրազգային օգտվողների առնչությամբ ասվածի մեծ մասը վերաբերում է նաև սեփականատիրոջ կողմից ղեկավարվող ընկերություններին: Այս օգտվողների գործունեությունը ներառում է միջազգային բիզնեսի բոլոր բնագավառները, այսինքն՝ արտադրություն, տարածում և ծառայություններ:
Սեփականատիրոջ կողմից ղեկավարվող ընկերությունների դերը միջազգային բիզնեսում ամրապնդվելուն զուգահեռ դրանք նաև էլ ավելի հաճախ են ստեղծում օֆշորային կառույցներ՝ համաձայնագրեր կնքած և չկնքած պետություններում:
Այդ միտումը կշարունակվի, և սեփականատիրոջ կողմից ղեկավարվող ընկերությունները հետագայում ևս կկազմեն նոր օֆշորային կառույցներ գրանցող կառույցների մեծամասնությունը: